Það er LEIKUR AÐ LÆRA í Vesturbergi

Að fá að njóta sín á eigin forsendum, að fá að leika í friði, að fá að efla sköpunarþörf, að efla ímyndunarafl og að fá að sýna frumkvæði eru nokkrir þættir sem börn í Vesturbergi fá notið.
Bráðum tvítugur leikskólinn hefur haldið í þær hefðir og það skipulag sem upphaflega var lagt af stað með árið 1997. Ein af þeim fáu kennsluaðferðum sem bætt hefur verið við í Vesturbergi er Leikur að læra.

Upphafið af LAL í Vesturbergi var vorið 2015 þegar nokkrir kennarar lögðu land undir fót og héldu til Alicante í þeim tilgangi að kynna sér aðferðir LAL. Kennurum kom saman um að kennsluaðferðir LALmyndu henta vel og falla inn í aðferðafræði Vesturbergs. Haustið 2015 hófst innleiðingarferlið með Kristínu Einarsdóttur höfundi og eiganda Leikur að læra í fararbroddi. Kennarar hafa allir farið í gegnum innleiðingarferli og ef nýir kennarar hefja störf er boðið upp á nýliðanámskeið hjá LAL.

Leikur að læra er kennsluaðferð þar sem börnum á leikskólaaldri og fram að miðstigi í grunnskóla eru kennd bókleg fög í gegnum leiki og hreyfingu á skemmtilegan, líflegan og árangursríkan hátt. Það er svo ótrúlega heppilegt þegar aðferðir finnast þar sem allir, bæði kennarar og nemendur njóta sín. Kennarinn fær í hendurnar frábært verkfæri þar sem hann getur notað ýmsar aðferðir til að kenna bæði læsi og stærðfræði. Kennarar sem nýta sér aðferðir Leikur að læra fer smátt og smátt að tileinka sér námsefnið frá öðru sjónarhorni, frá sjónarhorni barnanna og þörf þeirra til að hreyfa sig.

Einn hluti af kennsluaðferðinni er foreldraverkefni, en tvo morgna í viku, gera börnin verkefni þar sem foreldrar taka þátt með börnum sínum, framkvæma verkefni og hreyfingu í kjölfarið. Foreldrar hafa áhuga og hafa sýnt heilmikla leikni í verkefnunum.

Vesturberg varð formlega hluti af Leikur að læra liðinu þann 26. ágúst 2016.

Brynja Aðalbergsdóttir, leikskólastjóri Vesturbergi

© 2016 - 2018 Karellen